Impakaamo ni Department of Migrant Workers Secretary Hans Leo Cacdac a naipaayn ti provisional release ti 17 a Pilipino a natiliw idiay Qatar gapu iti saan nga otorisado a “demonstration” wenno protesta dagitoy.
Sigun kenni Cacdac bayat ti press briefing ita nga aldaw, dinutukan ni President Ferdinand ”Bongbong” Marcos Jr. ti maseknan nga ahensia nga aggawar tapno mawayawayaan ti 17 a Pilipino.
Iti baet a nawayawayaan dagiti nasao a Pilipino, kinuna ni Cacdac a saanda pay a mabalin nga agawid iti Pilipinas bayat nga agtultuloy ti maisaysayangkat nga imbestigasion dagitoy.
Sigun iti nasao nga opisial, awan ti pay ti kaso a naipila kontra kadagiti 17 a Pilipino a karaman iti nasao a panagprotesta.
Ti pannakakemmeg kadagiti Pilipino ket gapu iti mapapati nga ilegal “assembly”, nga addaan ti pannusa a pannakaibalud iti innem a bulan agingga tallo a tawen, ken multa a 10,000 Qatari Riyals agingga 50,000 Qatari Riyals.
Pinagyamanan met ni Cacdac ti gobierno ti Qatar iti panangipalubos a maipaayan ti provisional release ti 17 a Pilipino.
”We’re very, very thankful to the Qatari authorities, to the Qatari government for allowing the provisional release of the 17 as the investigation proceed and as directed by the President, legal assistance and welfare assistance will continually be provided to the 17.”
Department of Migrant Workers Secretary Hans Leo Cacdac
