BAGUIO CITY- Manamnama a makagraduar ti 18 a Persons Deprived of Liberty a naka-enrol iti Tagapangalaga Ko, Guro Ko Program iti Baguio City Jail Male Dormitory.
Iti nasao a bilang, tallo ti naka-enroll iti elementaria, pito iti junior high school, lima iti Alternative Learning System Senior High School Grade 11, dua iti Grade 12 ken maysa a Senior High School.
Naidatag ti bilangda bayat ti Kapihan sa Piitan ti Bureau of Jail Management and Penology Male Dormitory nu sadinno, naiparang ti accomplishment ti nasao nga opisina.
Imbinglayda nga amin a PDLs ket makabasa ken makasurat.
Kabayatanna, tallo a PDLs ti naka-enroll iti College Education Behind Bars; maysa ti agad-adal iti First Year iti kurso a Bachelor of Physical Education; ken dua para a 2nd Year iti kurso a Bachelor of Science and Tourism Management.
Malaksid kadagiti estudiante a PDLs, dumanon iti 772 ti pakabuklan a benepesiario ti skills development training babaen iti TESDA ken dadduma pay a partners ti nasao nga ahensia para iti skills training.
Dagiti skills training ket pakairamanan ti bayong making, rattan making, ken string doormat making.
Kaadduan a PDLs ket nagpalista para iti bayong making. //Bombo Noveh
