Pimmusay ti agtawen iti 18 a nangpaltog iti bukodna a bagi, kalpasan a pinaltuganna ti ex-girlfriendna iti unneg ti Sta. Rosa Integrated School idiay Nueva Ecija.
Malamlamayan ita ti bangkayna iti pagtaegan dagitoy.
Kabayatanna, comatose paylaeng ti biktima ken adda iti kritikal a kasasaad.
Maipalagip a napasamak ti insidente kalpasan a sinumrek daydi 18-year-old student iti unneg ti pagadalanda ken pinaltoganna ti agtawen iti 15 nga ex-girlfriend-na idi August 08, 2025.
Kalpasan dayta, pinaltuganna met ti bukodna a bagi.
Sigun iti lolo ti Grade 8 a biktima, makinkanigid a paset ti ulo ti apona ti natamaan.
Maur-uray paylaeng ti operasion ti biktima, agsipudta kasapulan a maaddaan iti puot sakbay a maisayangkat ti operasion sigun kadagiti doktor.
Kabayatanna, naduktalan nga awan ti serial number ti paltog nga inaramat ti suspek.
Nupay kasta, impanamnama ni PMaj. Willard Dulnuan, Chief ti Sta. Rosa PNP a padasenda a sapulen no siasino ti nagalaan ti suspek iti nasao a paltog.
Gapu iti napasamak nga insidente, nangisayangkat ti Department of Education ken dagiti otoridad iti taripnong tapno pagsaritaanda dagiti posible a pannakapasayaat ti seguridad ti nasao a pagadalan.
