BAGUIO CITY – Dumanon iti 185 a barangay iti rehiyon Cordillera ti awanan iti nagkandidato para iti kina-chairman ken kagawad ti Sangguniang Kabataan (SK).
Maibasar iti datus ti Department of the Interior and Local Government – Cordillera, amin a 152 a barangay iti probinsia ti Kalinga ket awan ti nagkandidato iti kina-chairman ken kagawad ti SK.
Simmaruno ti Apayao nga addaan 18 a barangay nga awanan nagkandidato iti SK, maikatlo ti siudad ti Baguio a 9 a barangay bayat a sag-2 ti Benguet ken Mt. Province ken saggaysa met ti Abra ken Ifugao.
Sigun kenni DILG-Cordillera regional director Marlo Iringan, posible nga intunda daytoy ti panakakumikom dagiti agtutubo ken ti panakapukaw ti interesda nangruna ta naming adun a naitantan ti eleksion para iti SK.
Nupay kasta, kinunana nga ad-adalenda ita ti posibilidad a panakaipatungpal ti special election wenno madutukan laengen dagiti agtukaw kadagiti bakante a posisyon iti SK.
Naamuan met nga iti 1,175 a barangay iti entero a rehiyon ket 2,427 dagiti nagngayangay para iti SK chairman ken 5,024 iti SK kagawad.
