![](https://img.bomboradyo.com/baguio/2020/12/rice-nature-food-plant-1536x1020-1.jpg)
BAGUIO CITY – Posible a maragpat ti pagilian ti 19.44-million metric tons a kaadu ti irik nga apit dagiti mannalon iti pakabuklan ti agdama a tawen.
Nailanad iti pattapatta ti Philippine Statistics Authority a buklen daytoy ti aktuwal a produksion ti irik a 11.9-million metric tons manipud Enero agingga Setyembre ken ti manamnama a 7.54-million metric tons a mailista nga apit iti Oktobre agingga ita a bulan ti Disyembre.
Sigun kenni Agriculture Secretary William Dar, napintas daytoy a damag gaputa nabaelan latta dagiti mannalon ti bagas iti pagilian a maka-apit iti adu nga irik iti baet ti panagdalapos dagiti sumagmamano a bagyo a nagresulta iti panakadadael ti agarup 419,560 metric tons a pagay.
Dinakamatna a no maragpat ti 19.44-million metric tons a rice production ti pagilian ita a tawen ket daytoyen ti kangatuan a rekord iti apit iti pagilian.
Naamuan a kangatuan a produksion iti irik ket nailista iti Luzon, partikular kadagiti rehion ti Central Luzon, Cagayan Valley ken Ilocos Region bayat nga iti Visayas ket sadiay Ilo-ilo ken iti Mindanao ket sadiay Soccsksargen ken Northern Mindanao.
Sigun pay kenni Sec. Dar, ti napintas a produksion ti irik wenno bagas iti pagilian ket bunga iti kinatibker ken kinagaget dagiti mannalon ti pagilian ken ti natiber a suporta kadagitoy dagiti lokal a gobyerno ken ti pribado a sektor.