BAGUIO CITY – Agtultuloy ti imbestigasyon dagiti pulis iti kaso ti dua a bangkay dagiti lalaki a nasarakan iti baba ti rangkis iti nagsina a lokasyon sadiay La Trinidad, Benguet idi kalman.
Sigun kenni PMaj. Cleff Vencio, hepe ti La Trinidad Municipal Police Station, nasarakan ti maysa a bangkay iti rangkis iti Pico-Lamtang Road sadiay Barangay Puguis babaen iti maysa a residente sadiay.
Kinunana a nabigbig ti bangkay a ni Johnny Rabang, 55-anyos, taxi driver ken residente ti San Carlos Heights, Baguio City.
Dinakamatna a ni Rabang ket sigud a drug surrenderee ken maysa kadagiti high value targets dagiti pulis ti Baguio City.
Simmaruno a nasarakan ti lamo-lamo a bangkay ti lalaki iti Lamut Junction sadiay Barangay Beckel babaen kadagiti dua nga agpatpatrolya a barangay tanod.
Nupay kasta, awan paylaeng ti nangbigbig iti nasao a bangkay.
Sigun pay kenni PMaj. Vencio, agpada a nagsagrap dagiti dua a bangkay iti sag-dua a tama ti bala ti paltog.
