BAGUIO CITY – Pimmusay ti dua a barito kalpasan a naidungpar ti naglugananda a motorsiklo iti maysa a dump truck iti deppaar ti Abra-Kalinga Road, partikular sadiay Mudiit, Dolores, Abra idi kalman.
Nabigbig dagitoy a da Janleanne Kiefer Blanco, driver ti motorsiklo ken John Dreifus Tumalip, backrider, agpada a 16-anyos ken residente ti Zone 5, Bangued, Abra.
Nabigbig met ti driver ti dump truck a ni Sistofer Bayubay, 24-anyos ken residente ti Badas, San Juan, Abra.
Iti interview ti Bombo Radyo Baguio kenni PLt. Elizalde Kibayen, Deputy Chief of Police ti Dolores Municipal Police Station, kinunana a pasang-at iti kalsada ti dump truck bayat a pasalog met ti motorsiklo.
Sigun kenkuana, iti nasao a gundaway ket nakadlis ti kalsada gapu iti napigsa a bayakabak ti tudo.
Kinunana a napartak pay ti panagpataray ni Blanco iti motorsiklo daytoy agingga a napukawan iti kontrol iti zigzag a paset ti kalsada agingga a naidungpar iti kasabatna a dump truck.
Gapu iti kapigsa ti panakaidungpar ti motorsiklo iti truckk, nagsagrap dagiti dua a barito iti adu a dunor a nagresulta iti dagus nga ipupusayda.
Naitaray pay dagitoy iti pagagasan ngem naideklara a pimmusaydan.
Sigun pay kenni PLt. Kibayen, saan a nakasuot iti helmet dagiti barito.
Iti agdama, addan iti kustodiya ti pulisya dagiti lugan a nairaman iti insidente ken ti driver ti truck para iti kaseknan a disposisyon ti kaso.
Naamuan pay nga accident-prone area ti nakapasamakan ti insidente.
