BAGUIO CITY – Nangibulos manen iti danum ti dua a dams iti Benguet kalpasan a ngimmato ti lebel ti danum kadagitoy gapu iti panagtudo nga intunda ti bagyo a Rolly ken ti mapaspasaran a panagtudo iti probinsia.
Maibasar iti advisory ti National Power Corporation (NAPOCOR), nailukat ti saggaysa a gate ti Binga Dam sadiay Itogon ken Ambuklao Dam sadiay Bokod iti saggaysa a metro tapnu makontrol ti panagayos ti danum.
Nailanad pay iti advisory a saan a mangitunda iti panaglayos ti manarimaan nga spilling operations kadagiti nabigbig a flood warning zones ti Binga Dam ken Ambuklao Dam.
Maibasar iti kaudian nga NPC Dam Status, idi rabii ket adda iti 751.25 meters ti lebel ti danum iti Ambuklao Dam nga asideg iti 752.00 meters a normal high water level daytoy bayat nga adda met iti 574.20 meters ti lebel ti danum iti Binga Dam nga asideg iti 575.00 meters a normal high water level daytoy.
Agturturong iti Binga Dam ti danum a maibulbulos manipud iti Ambuklao Dam.
