BAGUIO CITY – Sumangsango iti kaso a panaglabsing iti RA 8485 wenno Animal Welfare Act of 1998 ti dua nga indibidual kalpasan a nakemmeg dagitoy gapu iti panangsabidong ken panangalada iti pinatayda nga aso sadiay Middle Quezon Hill, Baguio City idi kalman.
Nabigbig dagitoy a da Edmund Calado Landisan, 37-anyos, owner/operator ti taxi, residente ti San Carlos Heights, Irisan, Baguio City ken ni Richard Rasti.
Nabigbig met dagiti complainant a da Lhynn Fabianes, Albert Valdez ken Rommel Damo a bin-ig a residente ti Quezon Hill, Baguio City.
Sigun iti pulisya, nakita iti video footage a naala ti CCTV cameras ti panagsardeng ti taxi nga addaan plaka nga AYU 179 iti abay ti maysa nga aso iti kalsada.
Nakita iti video footage ti in-inot a panakatay ti nasao nga aso.
Inyasideg pay dagiti suspek ti taxi ken inluganda ti nasao nga aso.
Nasarakan met iti kapada nga aldaw ti dua pay a natay nga aso a mapapati a nasabidongan.
Nakemmeg met dagiti suspek iti follow-up operation dagiti otoridad.
Naamuan a dua a bulan a binanbantayan dagiti barangay officials ken dagiti barangay tanod ti nasao a modus dagiti suspek. (-with Bombo Nikki Agsiweng)
