BAGUIO CITY – Nakemmeg ti dua a drug pushers iti buy-bust operation nga insayangkat dagiti otoridad sadiay Kitma Road, Bakakeng Central, Baguio City.
Nabigbig dagitoy a da Mary Joy Bautista Caasi alyas Rejy Bautista, 22-anyos, call center agent, residente ti Bakakeng Sur, Baguio City ken ni Luke John Banya-ao Ya-o, 25-anyos, awanan trabaho, tubo ti Tabuk City, Kalinga ken residente ti Irisan, Baguio City.
Nakumpiskar kadagitoy ti agarup nasurok 250 a gramo ti napagango a bulong ti marijuana.
Nadiskobre metlaeng iti bag ni Caasi ti medicine container a naglaon ti marijuana leaves, pakete a naglaon ti maatap a marijuana ken bulbulong ti marijuana a nabalkot iti papel.
Nakumpiskar met laeng ti lugan nga ar-aramaten dagiti dua nga agilako iti kontrabando.
Sumangsango metten dagitoy iti kaso a panaglabsing iti Comprehensive Dangerous Drugs Act of 2002.
