Inlawlawag ni City Disaster Risk Reduction and Management Office (CDRRMO) Chief Engineer Charles Carame nga mas komplikado ti panakaipaay iti tulong kadagiti driver iti taxi gapu iti setup wenno sistema dagitoy nu sadino, adda dagiti dua wenno nasursurok pay a driver iti tunggal yunit ti taxi.
Sigun kenni Engr. Carame, saludsod nu siasino kadagiti driver iti tunggal a yunit ti maipangruna a maipaayan iti pinansyal a tulong kaspangarigan addaan daytoy iti dua wenno tallo.
Iti agdama, agtultuloy pay latta ti panagkolektar ti lokal a gobyerno ti siudad kadagiti datos tapno makabukelda iti mekanismo seknan iti panakipaay ti tulong pinansyal kadagiti taxi drivers.
Maipalagip nga idi napan a lawas ket immapela met dagiti driver ti taxi para iti panangikonsidera iti gobyerno kadakuada a maipaayan iti ayuda kas paset iti sektor ti transportasyon ken maap-apektaran metlaeng iti nangato a presyo iti produkto a petrolyo.
Daytoy ket kasaruno ti panakaipaay ti sag-lima a ribo a piso a financial aid kadagiti driver iti jeep para iti nakiddaw a panangilaylayonda iti biaheda iti rabi-i tapno adda pagluganan dagiti komyuter nga agawid kadagiti pagtaengan wenno pagdagdagusanda.//BLNCLaica
