Nasurok 1,500 nga indibidual a residente iti Baguio City ti nakaawat kadagiti nadumaduma a libre a serbisio para iti salun-at babaen iti LAB FOR ALL wenno Laboratoryo, Konsulta at Gamot para sa Lahat, a naangay iti Camp John Hay Convention Hall ita nga aldaw, November 21, 2026.
Ti LAB FOR ALL ket maysa a kangrunaan a programa ti gobierno nga idadaulwan ni First Lady Louise Araneta-Marcos.
Panggep daytoy nga iyasideg kadagiti umili ti dekalidad ken libre a serbisio medikal, nangruna kadagiti senior citizens, napanglaw a pamilia, masikog, ken dagiti residente kadagiti adayo ken narigat a madanon a komunidad.
Babaen iti daytoy a programa, naipaay dagiti libre a medical consultation, physical examination, laboratory tests, X-ray, electrocardiogram wenno ECG, ultrasound, ken dental services.
Naipaay metlaeng dagiti kasapulan nga agas ken dagiti referral para kadagiti pasiente a masapul ti maituloy a pannakaagasda iti lokal a pagagasan wenno health center.
Iti panangidaulo ni First Lady Louise Araneta-Marcos, nakipaset met dagiti nadumaduma nga ahensia ti gobyerno, agraman ti Department of Health (DOH), PhilHealth, Department of Social Welfare and Development (DSWD), Department of the Interior and Local Government (DILG), TESDA, Philippine Charity Sweepstakes Office (PCSO), Food and Drug Administration (FDA), Public Attorney’s Office (PAO), ken ti lokal a gobierno.
Sigun ken DOH Secretary Edwin Mercado, saan laeng a serbisio medikal ti panggep ti LAB FOR ALL, no di ket maysa met a wagas tapno maiyasideg kadagiti umili dagiti sabali pay a serbisyo ken programa ti gobierno babaen iti panagtitinnulong dagiti nadumaduma nga ahensia.
Iti daytoy a wagas, saan a kasapulan a mapan pay dagiti residente kadagiti nagduduma nga opisina tapno agpatulong, gapu ta maiyasideg dagiti kasapulan a serbisio iti maysa a lugar, nangruna kadagiti pamilia a limitado ti kabaelanda iti panagbayad kadagiti medical ken dadduma pay a kasapulan.
Sakbay ti kangrunaan a caravan ita nga aldaw, naangay met dagiti medical mission iti Barangay Kias, Santo Tomas ken Dontogan idi November 17, 18 ken 19, a nangtarget iti 500 a benepisiario iti tunggal barangay. Naipaay kadakuada dagiti libre a konsultasion, laboratory tests, ECG, X-ray, ultrasound ken agas, babaen iti tulong dagiti boluntaryo a doktor ken health workers.
Babaen iti daytoy a programa, ipatungpal ti gobyerno ti panggepna a mangipaay iti nasaysayaat, nalaka a madanon ken inklusibo a serbisio pangsalun-at, tapno saan a magbalin a lapped ti kinakurang ti kuarta wenno kaadayo ti pagnaedan iti pannakaala ti umili iti kasapulan a pannakaasikaso ti salun-at dagitoy.
Maipalagip a ti LAB FOR ALL ket nabukel tapno saan laeng a serbisio medikal ti maipaay, no di ket mairaman met dagiti programa ti sabali a government agencies, kas iti pinansial a tulong, legal assistance, livelihood ken serbisio para kadagiti mannalon. //Bombo Khey Reparip











