--Ads--

Agtultuloy ti panagmonitor ken panaginspeksiyon ti Baguio City Health Services Office (CHSO) kadagiti food establishments iti siudad, nangruna iti food safety ken sanitation, iti panagsagana para iti adu a turista a mabalin a sumangbay iti Baguio iti holiday season.

Sigun kenni Dr. Celia Flor Brillantes, City Health Officer II, agtultuloy ti panagpatrolya ken panagmonitor dagiti health personnel uray iti rabii tapno masigurado a matungpal dagiti pagalagadan iti kinadalus ken kinatalged dagiti taraon a mailako kadagiti establisimyento.

Mainaig iti daytoy, impaganetget ti CHSO ti kinapateg ti nadalus a lugar a pangisaganaan ken pagilakoan iti taraon, tapno maliklikan ti posibilidad ti panagwaras dagiti sakit nga ipaay ti saan a natalged a pannangan.

Kabayatanna, impalagip ni Dr. Brillantes iti publiko ti kinapateg ti moderate ken balanse a pannangan iti umadani a holiday season, nangruna kadagiti addaan iti diabetes ken hypertension, tapno maliklikan dagiti komplikasion iti salun-at.

Sigun pay kenkuana, masapul a planuen dagiti pamilia dagiti taraon nga isagana para iti Noche Buena ken Media Noche tapno maliklikan ti nalabes a pannakaisagana ken pannakasayang dagiti taraon.

Inyunay-unay na met a saan a rason ti panagrambak iti Paskua ken Baro a Tawen tapno mangan iti nalabes, nangruna kadagiti addaan iti sakit a masapul a kontrolen ti panagkonsumo iti taraon.

Impalagip na pay ti kinapateg ti agtultuloy a panaginum kadagiti maintenance medicine, gapu ta mabalin a nangato ti peggad ti stroke iti nalabes a pannangan ken panaginum iti arak, ken no mapabay-an dagiti agas a naireseta kadakuada. //Bombo Khey Reparip