Agpatpataming ita sadiay Baguio General Medical and Health Center ti dua a pahenante ken maysa a drayber a nadangran kalpasan a nabaliktad ti nagluganan dagitoy a mini dump truck idiay Suello Village, Baguio City ita nga aldaw.
Ti nasao a dump truck ket naglaon iti cement bricks.
Dagiti nadangran ket pasig a lallaki ken adaanda iti ligal nga edad.
Iti panakiuman ti Bombo Radyo kenni Police Captain Freddy Chumayag, Operation Police Commission Officer ti Baguio City Police Office Station 9, kinunana a nagtaud ti mini-dump truck idiay Marcos Highway ken paturong daytoy idiay Km. 4 Asin Road, Baguio City idi naaddaan iti mechanical defect ti nasao a lugan.
Gapu iti dayta, naidungpar daytoy iti riprap iti kalsada a nangitunda iti pannakabaliktadna.
Innayon pay ni PCPT. Chumayag a nakasagrap laeng iti minor injuries dagiti tallo nga indibidual gapu iti dagus panagresponde dagiti nagduduma a responders a pakairamanan ti kameng ti 911 on call babaen iti panangidaulo ni Rafael Paeng Valencia ken Bureau of Fire Protection Emergency Medical Services.//Bombo Genzel Depayso
