BAGUIO CITY – Nakemmeg ti dua a balasang apu iti panagtakawda iti uneg ti kadakkelan a mall sadiay Luneta Hill, ditoy siudad ti Baguio idi kanikadua.
Nabigbig dagitoy a da Jaymeelyn Palaganas Dayog, 23-anyos, tubo ti San Carlos City, Pangasinan, residente ti Sumulong Street, Baguio City ken Mery Grace Revita Abucay, 21-anyos, tubo ti Umingan, Pangasinan, residente ti Foot Hill, Crystal Cave, Baguio City.
Maibasar iti report, manarimaan ti panangwanawan ti maysa a security guard kadagiti kostumer ti department store ti mall idi nakitana dagiti suspek nga adda iti ayan ti ladies accessories.
Nakitana ti panagala dagiti suspek kadagiti nagduduma a produkto ken ti panangilemmeg dagitoy iti uneg ti badoda.
Inuray ti gwardia dagiti suspek iti frisking area ken sadiay a kinomprontarna dagitoy.
Boluntaryo met nga inruar dagiti suspek dagiti ilemmegda a produkto nga aggatad amin iti nasurok ₱3,600.
Naibilin met ti panakaipisok dagitoy iti pagbaludan.
