BAGUIO CITY- Natiliw ti dua a lallaki kalpasan a nagpositibo dagitoy iti iligal a droga iti naipatungpal nga Anti-Drunk and Drugged Driving operation iti deppaar ti Marcos Highway, partikular sadiay Bayacsan, Taloy Sur, Tuba, Benguet.
Nabigbig dagitoy a da Ronald Custina Baladad, 56-anyos, driver, tubo ti Pico, La Trinidad, Benguet ken Rafael Benatero Torres, residente ti Santa Monica, Concepcion, Tarlac.
Resulta daytoy ti operasyon nga impatungpal dagiti nagtipon a pwersa ti Tuba Municipal Police Station, Lang Transportation Office-Cordillera, Highway Patrol Unit-Cordillera ken PDEA-Cordillera.
Naamuan a dagiti dua ket agpada a driver ti parapasahero a jeep.
Pinara dagiti otoridad dagiti lugan dagitoy gapu iti minor violations ken sadiay a nairekomendar ti panakaipasidongda iti drug test.
Nagpositibo met ti drug test dagitoy.
Iti agdama, naiturong dagitoy iti istasyon ti pulisya para iti umno a proseso ken dokumentasyon.
