BAGUIO CITY – Nakemmeg ti dua a drug pusher iti nagsina nga anti-illegal drug operation dagiti operatiba ti Philippine Drug Enforcement Agency – Cordillera ken ti pulisya ditoy siudad ti Baguio idi kalman.
Nakemmeg ni Joel Bagang Abbag, 47-anyos, mannursuro, tubo ti Tabuk, Kalinga ken residente ti Kayang-Hilltop iti naipatungpal a buy-bust operation sadiay idi parbangon.
Nakumpiskar kenkuana ti nasurok 2.5 a gramo ti mapapati a shabu ken ti naaramat a buy-bust money.
Nakemmeg metlaeng sadiay Lower Mabini Street ni Romeo Abucay Tan, 54-anyos, small town lottery collector, tubo ti Burgos, Pangasinan ken residente ti Molave Drive, Asin Road.
Nakumpiskar kenkuana ti maysa a sachet ti mapapati a shabu ken ti buy-bust money.
Sumangsango dagitoy iti kaso a panaglabsing iti RA 9165 wenno ti Comprehensive Dangerous Drugs Act of 2002.
