BAGUIO CITY – Sumangsango iti kaso a panaglabsing iti RA 9165 wenno iti Comprehensive Dangerous Drugs Act of 2002 ti dua nga estudyante a nakemmeg iti checkpoint/ interdiction operation nga insayangkat dagiti otoridad sadiay Poblacion East, Lamut, Ifugao idi Lunes, September 16.
Nabigbig dagitoy a da Christian Quintos, 21-anyos ken Paul Andrei Galvez, 21-anyos, agpadada a residente ti Bulacan.
Sigun iti pulisya, nakumpiskar iti dua nga estudyante ti 16 a marijuana bricks ken 4 a tubular form ti marijuana nga aggatad amin iti P2.5-M.
Insayangkat dagiti operatiba ti PDEA-Ifugao, PDEA-Mt. Province, PDEU Ifugao, RMFB 1501st COY, Banaue PNP, Lamut PNP ken Bontoc PNP ti nasao nga operasyon.
Kabayatanna, kinemmeg metlaeng dagiti otoridad ni Jerico Floralde, 21-anyos sadiay Tarlac.
Nakumpiskar kenkuana ti 4 a marijuana bricks nga agdagsen ti 4 kilos ken aggatad ti P480-K.
Naamuan a ti panakakemmeg ni Floralde ket resulta ti follow-up operation dagiti otoridad kasaruno ti panakakemmeg dagiti 14 a turista a nakalugan iti van iti checkpoint/ interdiction operation nga insayangkat dagiti otoridad iti Bontoc-Kalinga Road partikular sadiay Bontoc, Mt. Province idi Dominggo, September 15.
Sigun kadagiti otoridad, naballigi ti panakakemmeg dagiti indibidual a mangibibiahe iti iligal a droga manipud Kalinga babaen iti Bontoc-Kalinga Road wenno Banaue-Bontoc Road gapu iti napatibker a panagtalek babaen iti partnership ken good interoperability iti nagbabaetan dagiti amin a law enforcement units iti rehiyon ken kadagiti umili.
