BAGUIO CITY – Pimmusay ti dua a laborer iti napasamak a vehicular traffic accident iti deppaar ti Paracelis – Roxas, Isabela Road, partikular sadiay Sinigpit, Butigue, Paracelis, Mt. Province idi kanikadua.
Nabigbig dagitoy a da Renier Pilar Quinto, 26-anyos, driver ti maysa kadagiti motorsiklo a nairaman iti aksidente ken ti back rider daytoy a ni Benigno Llamas Quinto, 60-anyos, agpada a residente ti San Andres, Butigue, Paracelis.
Nabigbig met ti nadangran a driver ti maysa pay a motorsiklo a ni Daniel Capua, 20-anyos, laborer ken residente ti Laud, Palitud, Paracelis.
Maibasar iti report, manarimaan ti panang-overtake ni Capua iti motorsiklo nga imanmaneho ni Quinto idi aksidente a nadungpar ti motorsiklo ni Quinto ti likod a paset ti motorsiklo ni Capua.
Nangitunda daytoy iti panakapukaw ti dua a driver iti kontrol dagitoy kadagiti bukodda a motorsiklo a nagresulra iti panaka-aksidente dagitoy.
Naitaray dagiti tallo nga indibidual iti pagagasan ngem naideklara a dead on arrival ti dua a Quinto bayat a nagsagrap ni Capua iti saan unay a nakaro a dunor.
