BAGUIO CITY- Im-imbestigaran paylaeng dagiti pulis ti nagsina a kaso ti pammaltog iti dua a probinsia ditoy rehion Cordillera a nakadangran ti dua nga indibidual.
Immuna a nadangran ni Aaron Eduarde Er-rehman, 32-anyos, naasawaan, project contractor ken residente ti Gayaman, Luba, Abra kalpasan a pinaltogan ti saan pay a nabigbig a suspek ti padingpading daytoy idi kanikadua.
Maibasar iti report, maturog kuman dagiti kakadua ti biktima iti kalapaw dagitoy idi nakangngegda iti maysa a putok ti paltog a sinaruno ti panagpa-arayat ti biktima.
Dagus a naitaray ti biktima iti pagagasan para iti panakataming daytoy.
Kabayatanna, agtaltalinaed iti pagagasan ni Joey Lambayong Baguiwan, 24-anyos, naasawaan ken residente ti Gawaan, Balbalan, Kalinga kalpasan a pinaltogan ti saan pay a nabigbig a suspek ti tumeng daytoy idi parbangon.
Maibasar iti report, nagturong ti biktima ken ti lima a kakaduana iti maysa a panganan sadiay Dagupan Centro, Tabuk City, Kalinga tapnu gumatang ti taraon ken mainom.
Nupay kasta, sinurot dagitoy ti pito a suspek ken maysa kadagitoy ti nangiruar ken nangiputok iti paltog iti direksion ti biktima a nakatamaan daytoy.
Gapu met iti buteng ti nakamotorsiklo a kadua ti biktima, killaat a pinatarayna ti motorsiklona ngem kinamat dagiti suspek daytoy agingga a gagara a dinungparda ti biktima a nabigbig a ni Aguinaldo Bakidan, 28-anyos a nangitunda tapnu matnag daytoy iti kalsada ken agsagrap ti adu a gasgas iti takiag ken saka.
Dagus met nga intaray dagiti kakaduada ti dua a biktima iti pagagasan.
