Nangipila ni Senate Committee on Social Justice, Welfare, and Rural Development Chairperson Senator Erwin Tulfo iti gakat a mangipaay iti kanayunan a protekson kadagiti mangmangged a posible a maawanan iti trabaho gapu iti panangaramat iti artificial intelligence (AI) ken automated systems kadagiti kompanya.
Iti sidung ti Senate Bill No. 2563, panggep ni Sen. Tulfo nga amyendaran ti Article 298 ti Labor Code of the Philippines tapno mangipatungpal dagiti addang para kadagiti empleyado a mabalin a maikkat gapu iti AI-driven automation.
Sigun kenni Senator Tulfo, nupay saan a maliklikan ti panagsayaat ti teknolohiya, saan a rumbeng nga ipabaklay amin kadagiti mangmangged ti agbalin nga epekto daytoy nangnangruna ta nakadepende kadagiti trabahoda ti pagbiyagda kadagiti pamilyada.
Iti sidung ti nasao a singasing, kasapulan nga adda iti lehitimo a rason ti kompanya a mangikat iti maysa nga empleyado kas iti panagtipid iti pondo, ken nu awanen ti dadduma nga pagpilian nu di ti panangaramat iti AI a mabalin nga agresulta iti pannakapukaw ti trabaho ti maysa nga empleyado.
Malaksid iti dayta, nailanad iti nasao a gakat a responsibilidad ti employer a mangipaay iti separation pay, ken dadduma pay a benepisyo iti empleyado a maapektaran.
Kasapulan pay a maaddaan iti paabiso ken konsultasyon sakbay nga agdesisyonda nga ikaten ti maysa a mangmangged.
Impeksa metlaeng ni Sen. Tulfo a rumbeng nga agregget dagiti kompanya tapno mapagtalinaedda ti trabaho dagiti empleyado da iti baet ti kaadda ti AI.
