BAGUIO CITY – Nakemmeg ti dua a lalaki bayat a maan-anop ti dua a kakaduada gapu iti panangbagsolda iti maysa a driver iti sangwanan ti maysa a bar and restaurant sadiay Km. 4, Marcos Highway, Baguio City idi kalman.
Nabigbig dagiti nakemmeg nga agkabsat a da Arnel Teligo, 24-anyos, naasawaan, residente ti Green Valley, Dontogan, Baguio City ken Romnick Teligo, 26-anyos, naasawaan, residente ti Central Ambiong, Baguio City bayat a nabigbig dagiti maan-anop iti nagan nga Orlando Tallawan ken Joel Lag-asan, agpada a taga-Dontogan, Baguio City.
Nabigbig met ti biktima dagitoy a ni Darwin Calbone, 38-anyos, naasawaan, driver ken residente ti Balsigan, Baguio City.
Maibasar iti salaysay ni Brian Balisong a pagayam ti biktima, agawid kuman dagitoy, kaduada ti uppat pay a papagayamda manipud iti nasao a bar and restaurant idi killaat a rinaut ti grupo ti lima a saan pay a nabigbig a lallaki ti tallo kadagiti kakaduada.
Ginandatna ti aganawa kaduana ti maysa a kadua met dagiti suspek agingga a timmaray dagiti suspek iti saan a masinunuo a direksion.
Sadiay met a nadlawna ti biktima a naka-iggem iti tiyanna ken imbaga ti biktima a nabagsol daytoy.
Intarayda ti biktima iti pagagasan a na-admit para iti operasyon bayat nga iti follow-up investigation dagiti pulis ket nakemmeg ti agkabsat a Teligo.
