BAGUIO CITY – Nakemmeg ti dua nga indibidual gapu iti iligal a panagpukanda ti kayo ken iti panaglabsingda iti Chainsaw Act of 2002 sadiay Marag, Luna, Apayao.
Nabigbig dagitoy a da Ronald Oamil Dugay, 47-anyos, naasawaan, agtagikua iti maysa a lumber business ken Edwin Manzano Wamil, 59-anyos, naasawaan, chainsaw operator ken agpada dagitoy a residente ti Marag, Luna, Apayao bayat a nakumpiskar kadakuada ti maysa a chainsaw.
Maibasar iti report, manarimaan ti panagpatrolya dagiti pulis iti nasao a lugar idi nadiskubreda ti sumagmamano nga iligal a naragadi a kayo a tanguili ken maysa a chainsaw iti presensia da Dugay ken Wamil.
Napaay dagiti dua a nangipakita iti kaskenan a dokumento a nangituinda iti panakemmeg dagitoy ken panakakumpiskar ti nasao a chainsaw.
Kabayatanna, narekober ti maysa nga MK2 Grenade sadiay Swan, Pudtol, Apayao.
Sigun iti Apayao PNP, nakita ni Manie Diza ti nasao a granada isut gapuna a dagusna nga inreport daytoy kadgiti maskenan a pulis.
Iti agdama, adda ti nasao a granada iti kustodiya ti Apayao PNP para iti umno a disposisyon.
