BAGUIO CITY – Nakemmeg ti dua a lalaki kalpasan a naaktuan dagiti kameng ti Public Order and Safety Division (POSD) ti panangtakaw dagitoy iti selpon ti maysa a babai iti sango ti paradaan ti Kias sadiay Perfecto St., siudad ti Baguio idi kalman.
Nabigbig dagitoy a da Nilo Badecao Caballero, 27-anyos a residente ti Tuding, Itogon, Benguet ken ti kaduana a ni Elmer Aligo Castro, 28-anyos, tubo ti Sagada, Mt. Province ken residente ti Barangay Campo Sioco, Baguio City.
Ti biktima ket 21-anyos, maysa a balasang, tubo ti La Union ken residente ti Barangay City Camp, Baguio City ken agtatrabaho kas customer service assistance.
Maibasar iti report, magmagna ti biktima iti nasao a lugar idi nakita dagiti kameng ti POSD ti panang-ala dagiti suspek iti selpon ti biktima iti uneg ti bag daytoy a nangitunda met tapnu kamatenda dagiti suspek.
Narekoberda ti selpon ti biktima manipud iti ikot ni Caballero ken positibo met a binigbig ti babai ti nasao a gadget a nangitunda iti panakaiturong ni Caballero iti pagbaludan.
