BAGUIO CITY – Sumangsango iti kaso a panaglabsing iti Comprehensive Dangerous Drugs Act of 2002 ti dua a lalaki a nakemmeg kalpasan a naaktoan dagitoy nga agar-aramat iti marijuana sadiay Lion’s Park, siudad ti Baguio idi kanikadua.
Nabigbig dagiti suspek a da Alexander gabor, 25, estudyante ken residente ti Upper QM, ken ni Philip Villanueva, 30, dog breeder ken residente ti Aurora Hill, Baguio city.
Maibasar iti imbestigasyon ti pulisya, nakita ti maysa a concerned citizen a nakaparada ti lugan dagiti suspek iti nasao a parke ken agsususop iti maatap a marijuana manipud iti maysa a glass pipe.
Dagusna met daytoy nga inreport kadagiti pulis a nakabantay iti BGH Rotunda a nangitunda ti dagus a panakakemmeg dagiti suspek.
Nakumpiskar manipud kadagiti suspek ti uppat a transparent plastic sachet a naglaon iti maatap a napagango a bulong ti marijuana, nakarolyo a transparent cellophane a naglaon iti maatap a marijuana, duwa a glass pipe, ken daduma pay.
