BAGUIO CITY – Nakemmeg ti dua nga indibidual gapu iti panangibiaheda iti naragadi a kayo nga awanan ti kaskenan a dokumento iti deppaar ti Tabuk-Paracelis Road partikular sadiay Hilltop, Purok 6, Bulanao, Tabuk City, Kalinga idi kalman.
Nabigbig dagitoy a da Jerry Salibad, 46-anyos, naasawaan, driver ti lugan a nakaikabilan dagiti kayo ken ni Albert Ganagan, 38-anyos, baro, helper ti nasao a lugan ken agpada dagitoy a residente ti Nambucayan, Tabuk City, Kalinga.
Maibasar iti report, nakaawat ti pulisya iti report seknan iti puraw a mini dump truck elf manipud Nambucayan, Tabuk City, Kalinga a naglaon ti saan a mabilang a naragadi a kayo.
Gapu iti daytoy, nangipatungpal dagiti pulis iti checkpoint ngem idi pasardengenda ti nasao a lugan ket intarayanna dagiti pulis.
Nupay kasta, nakamatan dagiti pulis ti nasao a trak ken kalpasan ti beripikasyon ket naduktalan nga awan ti imet ti driver ken ti helper a kaskenan a dokumento para iti panangibiaheda kadagiti naragadi a kayo.
Nangitunda daytoy tapnu kemmegen dagiti pulis ti dua nga indibidual nga ita ket sumangsango iti kaso a panaglabsing iti Presidential Decree 705 wenno ti Revised Forestry Code of the Philippines.
Naipaima met dagiti nasao a kayo iti CENRO para iti imbentaryo ken umno a disposisyon.
