BAGUIO CITY – Dead on arrival iti pagagasan ti dua a lallaki kalpasan a napalpaltogan dagitoy iti sangwanan ti maysa a balay sadiay Gilfilan Street, Dagupan Centro, Tabuk City, Kalinga idi kanikadua.
Nabigbig dagitoy a da Silver Calizar Pukin aka ‘Kintoy’, 36-anyos ken Dexter Buslig, 41-anyos, agpadada nga awanan trabaho ken residente ti Dagupan Centro, Tabuk City.
Maibasar iti panakiyuman ti pulisya iti residente sadiay a ni Mark Guiang, naamuan nga adda daytoy iti uneg ti boarding house dagitoy idi nakangngeg iti nagsasaruno a kanalbuong ti paltog.
Rimuar daytoy tapnu kitaenna ti napasamak ken sadiay metten a nakitana dagiti biktima nga agkidkiddaw ti tulong.
Timmawag daytoy iti Tabuk City DRRMC ken dagitoy ti nangiturong kadagiti biktima iti Kalinga Provincial Hospital.
Nupay kasta, naideklara a natayen dagiti biktima idi nakasangpetda iti pagagasan gapu iti nasagrap dagitoy a tama ti bala ti paltog.
Nagsagrap ni Buslig ti maysa a tama ti bala iti tengnged bayat a nagsagrap ni Pukin ti adu a tama ti bala ti paltog.
Narekober met ti PNP-SOCO ti uppat a basyo ti Caliber .45 iti nakapasamakan ti krimen.
Agtultuloy met ti panangimbestigar dagiti pulis iti nasao a kaso tapnu mabigbig dagiti suspek.
