BAGUIO CITY – Nadangran ti dua nga indibidual iti panagdinnungpar ti maysa a truck ken maysa a fortuner iti deppaar ti Marcos Highway, partikular sadiay Caucalan, Taloy Sur, Tuba, Benguet idi kalman.
Nabigbig dagitoy a da Joselito Villanueva, 41-anyos, naasawaan, driver ti trak, residente ti Dupax del Sur, Nueva Vizcaya ken ti helper daytoy a ni Randy Basileg, 30-anyos, baro ken residente ti Yagyagan, Tuba, Benguet.
Saan met a naan-ano ti driver ti fortuner a ni Irwin Tejada, 47-anyos ken residente ti East Gibraltar Road, Baguio City.
Maibasar iti report, pasalog ti trak idi napukaw ti driver ti preno ti lugan a nangitunda tapno madungparna ti pasang-at a fortuner sakbay a naidungpar ti trak iti riprap.
Nagresulta daytoy iti panakatnag ti trak iti rangkis nga addaan iti kauneg nga agarup sangapulo a metro.
Sigun iti Tuba Municipal Police Station, nagsagrap iti nakaro a dunor ti driver ti trak bayat a minor injuries ti sinagrap ti helper daytoy ken dagus dagitoy a naitaray iti pagagasan.
