BAGUIO CITY – Nadangran ti dua nga indibidual kalpasan a natnag iti rangkis ti nagluluganan dagitoy a para pasahero a jeep sadiay Pethal, Ekip, Bokod, Benguet idi kanikadua.
Nabigbig dagitoy a da Marcenia Buyayo ken Rogelio Gaboyo a naiturong iti Dennis Molintas District Hospital.
Maibasar iti report, imparada ti driver a ni Gardo Balaso, 36-anyos ken Barangay Kagawad ti Karao, Bokod ti nasao a para pasahero a jeep nga addaan plaka nga AYJ 778 tapnu agibaba kadagiti karga.
Naamuan a kabayatan ti panakaibaba dagiti karga ti lugan ket aksidente a nagabante daytoy agingga a natnag iti igid ti kalsada nga addaan kauneg nga agarup nasurok dua a metro.
Nangitunda daytoy iti panakadangran da Buyayo ken Gaboyo bayat a dagiti 14 a dadduma pay a pasahero, pakairamanan ti driver ket saan a naan-ano.
Nagsagrap met ti nasao a jeep iti adu a dadael.
