BAGUIO CITY – Nadangran ti dua nga indibidual iti panakatumba ti elf nga addaan iti plaka a UJS 565 sadiay Mankayan-Cervantes National Road partikular iti Baguyos, Colalo, Mankayan, Benguet partikular ti maysa nga elf truck nga adaan iti plaka idi kalman ti malem.
Ti nasao nga elf truck ket imanmaneho ni Omar Gavino Babalgue, 39-anyos ken residente ti Batbato, Cabiten, Mankayan, Benguet a naduktalan nga awanan iti driver’s license
Sigun kenni PCI Ronnie Albino, dadaulo ti Mankayan PNP, pababa iti kalsada ti nasao a truck a naglaon iti semento ken idi nadanon daytoy ti kurbaan ket napukawan iti preno isut gapuna nga indungpar ti driver ti lugan iti traffic sign post ken iti igid ti kalsada agingga a natumba.
Gapu iti daytoy ket naglak-am iti dunor ti dua kadagiti uppat a nakalugan iti likod ti elf a nabigbig a da Rixon Agustin Bargue, 17-anyos, baro, estudyante ken ni Paul Pemecda Tepang, 38-anyos, ken agpada a residente ti Bato, Cabiten, Mankayan.
Dagus met a naiturong dagitoy iti ospital sadiay Ilocos Sur.
Napagnunumoan met dagiti maseknan a partido ti amicable settlement iti nasao a kaso.
