Kinumpirma iti PNP–Cordillera a dua nga indibidual ti nasarakan nga unconscious kalpasan a nagswek ti naglugananda a government aircraft nga addaan iti logo iti Philippine Air Force, maris gray/white/orange, ken addaan iti plane number 10-39.
Nagswek ti aircraft iti maysa a forested area idiay Sitio Cabuyao, Poblacion, Tuba, Benguet, iti oras iti 10:20 a.m. ita nga aldaw, ngem naireport laeng daytoy iti 11:40 a.m.
Maysa kadagiti nakalugan ket manipod iti Philippine Airforce, bayat a maur-uray pay ti pakabigbigan iti maysa pay nga uniformed male individual.
Iti pannakiuman iti Bombo Radyo iti maysa a mannalon a maysa kadagiti nakasaksi, kinunana a mangal-ala daytoy iti uggot iti sayote idi nadlawna ti maysa nga eroplano a kasla paturong iti direksion daytoy. Mapapati a saanna unay a makita gapu iti napuskol nga ulap iti dayta nga oras isu’t gapuna a dagos a nagtaray.
Idi timmalyaw, nakitana ti eroplano ken nangngegna ti nabettak a sarming ken napigsa nga uni iti panagswek.
Dagos a nagkiddaw daytoy iti tulong manipod kadagiti kaarubana ken nakikatungtong nga umawag iti tulong.
Sigun kenkuana, dagos metlaeng a nagkiddaw iti tulong ti bayawna ken nagturong daytoy iti nakapasamakan ti insidente.
Iti agdama, agtultuloy paylaeng ti imbestigasion dagiti otoridad iti napasamak nga insidente.
