BAGUIO CITY- Nakemmeg ti dua a notorious nga illegal recruiter ditoy siudad ti Baguio iti entrapment operation nga impatungpal ti Baguio City Police Office ken Criminal Investigation and Detection Group.
Nabigbig dagiti suspek a da Yvette Valdez, 56-anyos, residente ti Sampaloc, Manila ken Orlando Milana, naasawaan, residente ti Agoo, La Union nga agpada a kameng ti Laus Illegal Recruitment Group nga agraraira iti siudad ti Baguio ken iti probinsia ti Benguet.
Nakumpiskar manipud kadagiti suspek ti marked ken boodle money a dumanon iti P210,000; pito a set ti employment contract, maysa a ledger ti aplikante ken commensurate payment; nagduduma a leaflets ti POEA ken maysa a travel agency.
Sumangsango ti dua a suspek iti panaglabsing iti RA 8042 wenno ti Migrant Worker Act.
Mainaig iti daytoy ket balbalakadan manen ni PCI Marlo Evasco, dadaulo ti BCPO Station 7 dagiti umili nga agaplikar laeng dagitoy kadagiti lehitimo a recruiter.
Al-allukuyenna dagiti dadduma pay a nabiktima dagiti suspek nga agturong dagitoy iti istasion ti pulisya tapno mangipila iti reklamo.
