BAGUIO CITY – Napadayawan ti dua a lokal a gobyerno ken dua a pagadalan ditoy rehion Cordillera iti kaleppas a 19th National Gawad KALASAG (KAlamidad at Sakuna LAbanan SAriling Galing ang Kaligtasan) Award.
Sigun iti Office of Civil Defense – Cordillera, gapu daytoy iti napintas a kontribusyon dagiti nasao a pagadalan ken lokal a gobyerno iti disaster risk reduction and management ken iti humanitarian assistance.
Nabigbig ti University of the Cordilleras kas Best Higher Education Institution iti entero a Pilipinas bayat a nagun-od met ti Lepanto National High School sadiay Mankayan, Benguet ti pammigbig kas 2nd Best School para iti Public-Rural Category.
Nagun-od met ti lokal a gobyerno ti La Trinidad, Benguet ti 2nd Best Disaster Risk Reduction and Management Council (DRRMC) iti 1st-3rd Municipality Category bayat a ti lokal a gobyerno ti Mt. Province ti nakaala iti 3rd Best Provincial DRRMC.
Nakaawat dagiti awardees iti plaques recognition ken cash prize a P100,000 para iti first place; P75,000 iti second place ken P50,000 iti third place.
Mainaig iti daytoy, guyguyuguyen ti OCD dagiti pagadalan ken dagiti lokal a gobyerno iti panangpatibkerda iti disaster response dagitoy.
