BAGUIO CITY–Nalaus ti ragsak dagiti napili kas 2018 Baguio-Benguet Lucky Summer Visitors a bukbuklen ti dua a paris ti aggayyem a millennials ken first-time visitors ditoy siudad ti Baguio.
Napili dagitoy iti stopover dagiti bus sadiay Sison, Pangasinan idi agsapa babaen iti selection team ti Baguio Correspondents and Broadcasters Club.
Immuna a napili ti aggayyem a da Elvein Coming, 30-anyos, factory worker, residente ti Taguig City, tubo ti Misamis Oriental ken Jayson Caseres, 23-anyos, welder, tubo ti Dumaguete City ken residente ti Taguig City.
Simmaruno a napili iti kapada a lugar ti aggayyem a da Ira Jane Miclang, 21-anyos, audit staff, residente ti Caloocan City ken Alvin Francisco, 26-anyos, IT help desk, residente ti Valenzuela City.
Dagus a nangrugi ti panakaipaay ti 4-day red carpet treatment kadagitoy.
Immuna a simmardengda kadagiti kangrunaan a tourist spot iti masakupan ti Tuba, Benguet a pasang-at iti siudad bayat a karaman kadagiti naituding nga aktibidad dagitoy ket ti panagsarungkarda kadagiti nagduduma a parke iti siudad, sadiay The Mansion, Camp John Hay, Lourdes Grotto, Tam-Awan Village, BenCab Museum ken dadduma pay ken ag-strawberry picking dagitoy sadiay La Trinidad, Benguet sakbay a sarungkaranda ti WINACA sadiay Tublay, Benguet.
Ag-courtesy call pay dagitoy kadagiti amin nga opisyales ti tunggal lokal a gobyerno a turongen dagitoy kas kada Mayor Muricio Domogan ken Benguet Governor Cresensio Pacalso.
Agmula pay dagiti lucky visitors sadiay media camp a sarunuen ti panagsarungkarda iti merkado publiko sakbay ti send-off dagitoy inton Dominggo.
Ti tinawen a Search for the Baguio-Benguet Lucky Summer Visitors ket paset ti Summer Vacation in Baguio Program.
