Kinumpirmar ti Bahri, maysa a shipping company idiay Saudi Arabi a dua a Pilipino a marino ti pimmusay kalpasan a nairaman a natamaan ti barko dagitoy iti napasamak a panangraut idiay Strait of Hormuz idi Agosto 31.
Saan metten a nangipaay iti kanayunan a detalye ti kampanya seknan iti napasamak nga insidente.
Nupay kasta, sigun iti maritime security nga UKMTO, timmama ti tallo a saan pay a nabigbig a projectile ti tanker bayat a dumaldalyasat dagitoy iti Hormuz.
Nagkari met ti nasao a shipping company a mangipaayda iti suporta kadagiti pamilya dagiti biktima ken mannarimaanen ti pannakikoordinarda kadagiti maseknan nga ahensya.
Kabayatanna, mannarimaan metten ti pannakikoordinar ti Department of Migrant Workers kadagiti maseknan nga ahensya iti ballasiw-taaw tapno dagos a maiproseso ti pannakarepatriate ti bangkay dagiti dua a Pilipino.
Inkarida metlaeng a mangipatulodda iti kaskenan a tulong ken assistance kadagiti Pilipino a posible pay a naapektaran gapu iti napasamak a panangraut.
