BAGUIO CITY – Nakemmeg ti dua a pulis-Benguet gapu iti panangkikkikilda kadagiti collector ken operator ti Small Town Lottery (STL) sadiay La Trinidad, Benguet.
Nabigbig dagitoy a da SPO3 Paulino Abance Lubos Jr. manipud iti Tublay PNP ken ni SPO4 Gilbert Legaspi nga intel operative ti Provincial Intelligence Branch ti Benguet PNP.
Sigun iti Philippine National Police Counter Intelligence Task Force (PNP-CITF), nakemmegda dagiti dua a pulis iti insayangkatda nga entrapment operation idi rabii iti uneg ti maysa a restaurant sadiay La Trinidad, Benguet.
Immuna iti daytoy, inreklamo da Ryan Olsina ken Jerbin Velasco, collector ken operator ti STL sadiay La Trinidad ti maatap a panagkolektar dagiti dua a pulis iti gatad a P5,000 manipud kadakuada.
Dagus met nga insayangkat ti task force ti entrapment operation kalpasan a naberipikarda ti impormasyon.
Nakumpiskar manipud kadagiti suspek a pulis ti P3,000 a cash a marked money.
Naammuan a daytoy ket ti balanse dagiti complainant manipud iti P5,000 a kidkiddawen dagiti nasao a pulis.
Iti agdama, addan iti headquarters ti task force sadiay Camp Crame dagiti suspek para iti panakaipila ti kaso a kriminal ken administratibo kontra kadagitoy.
Sigun iti PNP-CITF, modos dagiti dua nga agtiliw kadagiti collectors ti STL ket kikilanda dagitoy iti P5,000 agingga P40,000 kasukat ti panakawayawaya ken panakapaawan basol dagitoy.
Maipalagip a nasurok uppat a tawen ti napalabas, immawat ni Lubos Jr. iti Medalya ng Kagalingan manipud iti Cordillera PNP.
Nupay kasta, idi May 2015 ket naiparangen iti publiko ti nagan ni Lubos Jr. gaputa daytoy ti nangipakemmeg kadagiti dua a pulis a miembro ti Baguio City Police Office – Station 3 a napabasol a karaman a nangdukot ken nangrames iti maysa a babae sadiay Tuding, Itogon, Benguet.
Impetteng idi dagiti napabasol a pulis a panagkikil laeng ti motibo iti pammabasol kontra kadakuada agsipud ta iti kinapudnona ket naka-duty met dagitoy idi maatap a napasamak ti panagdukot.
Maipalagip pay a naibasura ti nasao a kaso iti Benguet Provincial Prosecutors Office gapu iti kinakurang ti ebidensiya ken basaran.
