BAGUIO CITY–Pimmusay ti dua a pulis bayat a nadangran ti 12 a dadduma pay, pakairamanan ti kongresista ti Abra ken ti mayor ti La Paz, Abra gapu iti napasamak a panagbettak ti granada iti plaza ti munisipyo idi parbangon kabayatan ti fireworks display a paset ti panagleppas ti pestibidad sadiay.
Nabigbig dagiti pimmusay a da PO3 Carlos Bacali Bocaig ken PO2 Frenzel Kitoyan ti Tadian, Mt. Province nga agpada a miembro ti Provincial Mobile Force Company ti Abra Provincial Police Office a karaman iti contingent a nai-deploy iti nasao a disso.
Pimmusay ni PO3 Bocaig bayat ti panakaitarayna iti pagagasan bayat a pimmusay ni PO2 Kitoyan bayat ti panakatamingna iti ospital.
Naamuan a ni PO3 Bocaig ket maysa a survivor iti Mamasapano Massacre.
Nadangran met da Abra Representative Joseph Sto. Niño Bernos, ti asawana a ni La Paz Mayor Menchie Bernos, ni PSI Apdilon Galong nga Acting Chief of Police ti La Paz PNP, ni PO2 Richard Basiag ti Danglas PNP ken ni Barangay Captain Darroll Azdi Gonzales ti South Poblacion, Bucay bayat a na-admit iti pagagasan dagiti pito kadagiti 12 a nadangran.
Sigun iti pulisya, posible a nakinayon ti suspek iti kaaduan ti tattao ken kabayatan ti panagrugi ti fireworks display ket imbarsakna ti mapapati nga MK2 fragmentation hand grenades iti asideg ti stage nga ayan dagiti biktima kas maibasar iti dua a levers ti mapapati nga MK2 fragmentation hand grenades a narekober dagitoy.
Iti agdama, na-activate ti Regional Special Investigation Task Group para iti napartak a panakarisut ti kaso.
