BAGUIO CITY – Pimmusay ti dua a senior citizens bayat a nadangran ti uppat nga apo dagitoy kalpasan a dinalapos dagitoy ti maysa nga SUV sadiay Kennon Road, partikular sadiay Canubas, Camp 4, Tuba, Benguet idi agsapa.
Nabigbig ti dead on the spot a senior citizens a da Sioning Pimiliw, 75-anyos ken Rosaline Alberto, 71-anyos, agpada a residente ti Camp 4, Tuba, Benguet bayat a nabigbig dagiti nadangran nga apo dagitoy a da Clara Valencia, 17-anyos; Ian Valencia, 16-anyos; Aedan Ruvic Viloria, 6-anyos ken ti 18-mos old a ni Sofia Angela Carbonell, bin-ig a residente ti Canubas, Camp 4, Tuba, Benguet.
Maibasar iti report, agur-uray dagiti biktima iti paglugananda paturong iti siudad ti Baguio.
Nupay kasta, aksidente a dinalapos dagitoy ti maysa nga SUV nga addaan plaka nga AJA 5168 a paturong met iti siudad ti Baguio.
Nagresulta daytoy iti dagus nga ipupusay ti dua a senior citizens ken panakadangran ti uppat nga apo dagitoy nga iti agdama ket addan iti nasayaat a kasasaad.
Nabigbig met ti driver ti SUV a ni Bernard Soriano a naitaray metlaeng iti pagagasan.
Mapapati a nakaturog ti nasao a driver.
