BAGUIO CITY – Pimmusay ti dua a soldado bayat a nadangran ti dua a kakadua dagitoy iti napasamak nga engkwentro iti nagbaetan ti 50th Infantry Battalion (50IB) ti Philippine Army ken dagiti kameng ti rebelde a New People’s Army (NPA) sadiay Baay, Pinukpuk, Kalinga idi kalman.
Sigun kenni Lt. Col. Martin Daiz Jr., commanding officer ti 50IB, nagresponde ti tropada iti naipadanun a report manipod kadagiti sibilyan mainaig iti presensia dagiti NPA nga agkutkutong kadagiti umili iti nasao a lugar.
Kinunana nga iti panagturong dagiti militar sadiay ket pinaputukan dagitoy dagiti kameng ti NPA a nangitunda iti engkwentro dagitoy.
Dagus a naitaray iti pagagasan dagiti nadangran a kameng ti militar bayat a mapapati nga adda met dagiti casualties iti benneg dagiti rebelde.
Imbilin met ni BGen. Perfecto Rimando Jr. ti panakaipatungpal ti pursuit operations kontra kadagiti nagsanod a rebelde kagiddan ti panangikarina a saan a maisardeng ti operasyonda sadiay Kalinga agingga a saan a napasuko wenno napasag ti kaudian a rebelde sadiay.
Impeksana pay ti panakipagladingitda iti pamilya dagiti pimmusay a soldado a nangisakripisyo iti biagda iti panagserbida kadagiti tattao ti Kalinga bayat nga impanamnamana a maipaay kadagiti biktima ti kaskenan a tulong iti kabiitan a panawen.
Nagkedked ti militar a mangipaay iti pakabigbigan dagiti casualties gaputa saan pay laeng a naipadanun kadagiti kabagianda ti napagteng dagitoy.
Iti agdama ket addan ti naipatulod a kanayonan a pwersa ti gobeyrno para iti panaka-anop dagiti naglibas a rebelde.
