BAGUIO CITY – Nakemmeg ti dua a turista gapu iti panagimet ken panagibiaheda iti marijuana sadiay Talaca, Agbanawag, Tabuk City, Kalinga idi rabii.
Sigun kenni PCol. Russel Job Balaquit, provincial director ti Kalinga PNP, naka-awatda ti impormasyon seknan iti panagbiahe dagiti dua a turista babaen iti parapasahero a bus paturong sadiay Manila ken adda ti imetda a maiparit a mula.
Dagus a nangisayangkat dagiti otoridad iti panag-checkpoint a nagresulta iti panakakemmeg dagiti dua ken panakakumpiskar dagiti kontrabando.
Nabigbig dagiti turista a da Delfer Jhay Navarrete Abancia, 23-anyos, baro, awanan trabaho ken ni Zamier Calvi Galo, 22-anyos, estudyante, agpada dagitoy a residente ti Adriatico Street, Malate, Manila.
Naamuan a ni Abancia ket addaan pending case a panaglabsing iti RA 9165 wenno Comprehensive Dangerous Drugs Act of 2002 iti Regional Trial Court – Branch 39 Metro Manila.
Sigun iti pulisya, dagiti dua a suspek ket baro nga identified drug personalities sadiay probinsia ti Kalinga.
Nakumpiskar manipud kadagitoy ti 15 bricks ti napagango a marijuana ken saggaysa nga elongated pack crush-dried marijuana ken medium sized plastic bag crush-dried marijuana.
Mapattapatta nga aggatad ti nasao a kontrabando iti P1.92-M.
Sumangsango ita dagiti suspek iti kaso a panaglabsing iti RA 9165.
