BAGUIO CITY – Pinatgan ti korte ti nakiddaw a 20-day Temporary Restraining Order (TRO) kontra iti panagtugaw ni Roger Sinot kas Indigenous Peoples Mandatory Representative (IPMR) ti Baguio City.
Pormal nga impaulog ni Regional Trial Court – Branch 6 Presiding Judge Cecilia Corazon Dulay-Archog ti TRO pabor iti grupo ni Atty. Manuel Cuilan.
Mainaig iti daytoy, naminsan manen nga impetteng ni City Mayor Mauricio Domogan a saan a personal ti rason dagitoy iti panagkiddaw ti City Legal Office iti maikadua a TRO kontra kenni Sinot.
Inlawlawagna a kangrunaan a rason iti daytoy ket dagiti kontrobersiya a sangsangwen ti maseknan a nakalanad met laeng iti petisyon dagiti mangtubtubngar iti panagtugaw daytoy iti konseho.
Inyunay-unayna a saan a napintas a dagiti agtugaw nga opisyal ti siudad ket adda iti sungsungbatanna nga isyu a kas iti naamuan a “disqualification” ni Sinot.
Kabayatanna, naituding met ti preliminary hearing iti nasao a TRO inton Pebrero 2.
