BAGUIO CITY – Ibaklay ti Baguio City Police Office (BCPO) ti mabusbos ti 20 nga estudiante ti Pinget Elementary School iti panagadal dagitoy iti las-ud ti makatawen.
Kinuna ni PCI Gil Imado, station commander ti BCPO Station 2, nagkiddaw ti principal ti nasao a pagadalan iti tulong ti pulisya kalpasan a napaneknekan ti kinakurapay ti pamilia dagiti nasao nga estudiante.
Kinunana a positibo ti sungbat ni City Director PSSupt. Ramil Saculles iti kiddaw ti nasao a pagadalan.
Dinakamat ni Imado a nagtitinnulong dagiti station commanders ti BCPO tapno makaur-or dagitoy iti gatad para iti panagadal dagiti nasao nga estudiante.
Innayonna a makisaoda iti principal ti Pinget Elem. School tapno mapagsasaritaan ti plano ti BCPO a mangipaay iti tulong kadagiti estudiante iti tunggal tawen.
