BAGUIO CITY – Balligi a naipatungpal ti arrival honors kenni Presidente Rodrigo Duterte sadiay Philippine Military Academy itay agsapa para iti Alumni Homecoming event dagitoy.
Pasado alas-nuebe iti agsapa idi nakadanun ti Presidente iti akademya ken sinabat daytoy dagiti nangangato nga opisyal ti pagilyan.
Naipaay metlaeng ti arrival honors kadagiti dignitaries nangruna kenni Pres. Duterte a simmarugkar sadiay PMA iti kaunaan a gundaway kas commander-in-chief ti Pilipinas.
Kalpasan ti arrival honors ket nagturong daytoy iti baro a barracks ken kinasaritana metlaeng dagiti kadete sadiay.
Kabayatanna, sumagmamano kadagiti dimmar-ay ket da senators Manny Pacquiao ken ni Allan Peter Cayetano nga adopted member ti PMA Tanglaw Diwa class of 1992.
Malaksid kadakuada, dimmar-ay metlaeng iti nasao nga okasyon da Sen. Panfilo Lacson a miyembro ti PMA Class of 1971, Retired General Hermogenes Esperon a miyembro ti PMA Marangal Class of 1974, ken ni DND Secretary Delfin Negrillo Lorenzana a miyembro ti PMA Class of 1973.
Adda metlaeng ni PNP Chief Ronald Bato dela Rosa a miyembro ti PMA Class of 1986, AFP chief of staff Eduardo Año a miyembro ti PMA “Matikas” Class of 1983 ken dadduma pay nga opisyal ti pagilyan.
Naamuan met a saan a dimmar-ay iti Alumni Homecoming ni Sen. Antonio Trillanes IV a miyembro ti “Marilag” Class of 1995.
