BAGUIO CITY – Maiyakar inton Setyembre 9 iti agdama a tawen ti 2018 Philippine Military Academy (PMA) Entrance Examination.
Iti panakiyuman ti Bombo Radyo kenni Lt. Col. Reynaldo Balido Jr., public information officer ti akademya, kinunana a daytoy ket gapu iti panagbaliw ti academic year dagiti pagadalan.
Kinunana nga iti sigud ket Agosto ti entrance exam ti PMA ngem gapu iti nabaliwan a serrek dagiti estudyante ket inyakarda met iti maikadua a Dominggo ti Setyembre ti nasao nga eksaminasyon.
Innayonna a babaen iti daytoy ket maisigurado a naka-settle pay dagiti estudyante iti klase dagitoy tapnu adda met ti panawenda a mangsango iti panagaplikarda para iti PMA Entrance Examination.
Kabayatanna, kinunana a narikna iti recruitment ti PMA ti epekto ti K-12 Program ti gobyerno.
Sigun kenni Balido, idi 2015 ken 2016 ket awan ti nagaplikar sadiay PMA a fresh high school graduates ken kaaduan ket nag-uray iti dua a tawen sakbay dagitoy a nakasumitir ti aplikasyon iti akademya.
Kinunana nga agarup 70 percent kadagiti nag-eksamin para iti entrance exam ti PMA idi napalabas a tawen ket dagiti nagturpos iti Grade 12.
Innayonna a dagitoy ti kaunaan a batch ti Grade 12 graduates a nagsumitir ti aplikasyon ken nakipaset iti eksaminasyon ti akademya.
