TALISAY CITY, CEBU – An-anupen ita dagiti otoridad ti suspek a kabsat metlaeng ti 14-anyos a biktima ti pammaltog bayat ti panag-module daytoy sadiay Talisay City, Cebu.
Immunan a naipadamag a pimmusay ti biktima kalpasan a sinerrek dagiti suspek ti pagtaenganda ken inaramid da ti krimen idi agsapa ti Biyernes, Abril 26.
Ngem maibasar iti imbestigasyon dagiti otoridad, ti 21-anyos nga inauna a kabsat ti biktima ti suspek.
Sigun pay iti nanang ti biktima, awanda iti pagtaengan dagitoy idi napasamak ti insidente ken naammoanna laeng kadagiti annakna a saan nga agpayso a sinerrek ti armado a lallaki iti balayda.
Kinunana pay a maatap a ti dua a kaarruba dagitoy ti nagaramid ti storya tapno makoberan ti aramid ti 21-anyos nga anak daytoy a nabigbig kas Edwin Jr.
Kabayatanna, inaklon ti maysa a kaarruba dagitoy a dinawatna laeng iti suspek nga ilemmengna ti paltog ngem saanna a ninamnama nga isu ti nakapatay iti biktima.
Sigun met kenni Police Lieutenant Colonel Epream Paguyod, Officer In Charge ti Talisay City Police a makasoan metlaeng dagiti kaarruba a nangilemmeg iti agpayso a napasamak iti biktima.
Karaman kadagiti reklamo ket obstruction of justice, homicide accessory to the crime, bayat a homicide ken illegal possession of firearms para iti 21-anyos a kabsat ti biktima.
Kidkiddawen met ti nanang ken dagiti daduma a kaarruba dagitoy a sumuko daytoy kadagiti otoridad.
