--Ads--
BAGUIO CITY – Sumangsango iti kaso a Presidential Decree 1602 wenno iligal a sugal ti 21 nga indibidual kalpasan a natiliw dagitoy gapu iti panagsugalda iti online a pallot iti maysa a balay sadiay Hilltop, Kayang, Baguio City itay laeng nabiit.
Maibasar iti report ti pulisya, inyemplementar dagiti operatiba ti Baguio City Police Office (BCPO) ken CIDG-Cordillera ti search warrant iti nasao a pagtaengan a paset ti Oplan Bolilyo.
Kabayatan ti operasyon ket nakumpiskar ti taya a nasurok P8,600; barahan; telebisyon ken kagawaan para iti koneksion ti internet.
Naiturong iti kustodiya ti CIDG – Cordillera dagiti nasao nga indibidual para iti panakaidokumento dagitoy.
