Naipatumpal ti maysa a kampanya para kadagiti mannalon ti rehiyon Cordillera babaen ti initiatiba iti nagbaetan ni Police Lt. General Edgar Alan Okubo, Deputy Chief PNP for Operations, Rotary Club Camp Crame, pakairamanan ti Southern Tagalog, NCR 121, ken CALABARZON Cavite Chapters ti Fraternal Order of Eagles-Philippines Inc.
Ti nasao a kampanya, nanaganan ti “Rescue the Crop, Beat the Pump: From the Cordilleras to the Metro” campaign no sadino direkta a naggatang dagiti nadakamat a grupo kadagiti Benguet farmers.
Kas panangsuporta, nangipaay ti Police Regional Office-Cordillera ti tulong nangnangruna iti panangfacilitate iti transportation ken pannakaiwaras dagiti nasao a nateng.
Gapu iti nasao a programa, agarup 21,000 a kilo ti nateng manipud Barangay Paoay ken Cattubo, Atok, Benguet to naisalba ken nailako.
Sakbay a naibyahe dagiti nateng, nai-empake ken nadalusan dagitoy babaen metlaeng kadagiti tattao ti Atok Municipal Police Statio, Bureau of Fire Protection, lokal a gobyerno ti Atok nga idadauloan ni Mayor Franklin Smith, ken dadduma a volunteers.
Indauloan ni Chief Regional Staff ti Police Regional Office-Cordillera a ni PCol. Froiland Lopez ken Chief of the Regional Community Affairs and Development Division PCol. Freddie Lazona ti ceremonial turnover dagiti nateng a maibyahe paturong Manila ken Region 4A para kadagiti food assistance programs, public pantries, ken maipaay kadagiti transport workers idiay partikular kadagiti PUV,TODA, ken TVNS drivers.
