Dumanon iti 22 a tattao ti pimmusay gapu iti napasamak nga uram iti maysa a pasdek sadiay Jakarta, Indonesia idi Disiembre 09, 2025.
Napasamak ti uram iti seven-story building a nangitunda iti napuskol nga asuk ken nakaigapuan ti panagbuteng dagiti umili ken trabahador iti maysa a kompania nga asideg iti insidente.
Sigun iti Central Jakarta police chief a ni Susatyo Purnomo Condro , mapapati a nagrugi ti uram iti umuna a kadsaaran agingga a nagwaras kadagiti dadduma a kadsaaran ti pasdek.
Innayon ni Condro a nagrugi ti uram kalpasan a nag-spark ti baterya ti maysa a drone iti storage ken testing area ti drone company.
Sigun kadagiti otoridad, kaadduan kadagiti biktima ket pimmusay gapu iti panaglang-ab iti asuk.
Kabayatanna, balligi nga inispal dagiti bombero ti agarup 19 a trabahador iti nasao a pasdek.
