Natiliw ti maysa a babai, agtawen ti 23, kalpasan a mapapati a nangpabasol iti maysa a kaarruba babaen ti social media sadiay San Juan, Abra.
Nakemmeg ni alyas “Jean” babaen iti panagregget dagiti operatiba manipod iti Mountain Province Provincial Cyber Response Team iti bileg ti warrant of arrest.
Ti suspek ket sumangsango iti kaso a panaglabsing iti Article 355 (Libel) ti Revised Penal Code nga adda pakainaigan iti Section 4(c)4 (Libel) ti RA No. 10175 Cybercrime Prevention Act of 2012, nga addaan ti nairekomenda a piansa a P10,000 para iti temporario a pannakawaya-wayana.
Mainaig iti daytoy, pinadawayan ni PNP Anti-Cybercrime Group Acting Director Brigadier General Bernard R. Yang ti naballigi nga operasyon dagitoy.
Iti baet daytoy, impalagipna iti publiko a responsibilidad ti tunggal maysa iti panagaramat ti social media.
