BAGUIO CITY – Tarigagay ti Land Transportation Franchising and Regulatory Board (LTFRB) a matulongan dagiti health workers iti transportasyon dagitoy ken dagiti drivers ken operators a nakaro a naapektaran iti agdama a pandemya.
Iti interview ti Bombo Radyo Baguio kenni Raymart Bartolo, project evaluation officer ti LTFRB-Cordillera, kinunana a nagresulta daytoy iti panangipatungpalda iti 24/7 free ride para kadagiti amin a health workers iti rehion Cordillera iti sidong ti service contracting program ti ahensia.
Kinunana nga immuna a naipatungpal daytoy ditoy Baguio City babaen iti uppat nga yunit ti modernized jeep a pagnumaran ti 12 a drivers.
Dinakamatna a kadagiti sumarsaruno nga aldaw ket marugian metten ti kapada a klase ti serbisyo nga idiaya dagiti tourist vans ken dadduma a kooperatiba wenno korporasyon dagiti parapubliko a jeep iti dadduma a paset ti rehiyon Cordillera.
Maipalagip nga iti service contracting program ti LTFRB ket adda ti maawat dagiti drivers a bayad manipud iti ahensia katukad ti kilometro a panagbiahe dagitoy.
Innayonna a mapaplano metten ti libre a transportasyon para kadagiti Authorized Persons Outside Residence.
Agleppas ti programa inton June 30 ken agsubli met dagiti nasao nga yunit ti jeep iti nailanad a ruta iti prangkisa dagitoy.
Inyunay-unay pay ni Bartolo a nakaalada ti pammalubos manipud iti lokal a gobyerno ti Baguio ken naipasidong iti inspeksion dagiti napili a lugan tapnu maipasigurado ti kinatalged dagitoy para kadagiti aglugan a health workers.
